Aliyekuwa mwanafunzi wa Shule ya Upili ya Moi Girls, Nairobi, aliyepatikana na hatia mauaji bila kukusudia ya wenzake 10 baada ya kuanzisha moto mkali mwaka wa 2017 atahukumiwa Februari 24.
Mwanafunzi huyo kwa jina T.W.G atajua hatima yake Jaji Stella Mutuku atakapotoa uamuzi wake baada ya kusikilizwa kwa kesi inayomkabili mnamo Alhamisi, Februari 10, People Daily iliripoti. Wakati moto huo mkali ukiteketeza bweni na kuua wenzake 10 huku wengine wakijeruhiwa, mwanafunzi huyo alikuwa kidato cha kwanza akiwa na umri wa miaka 14./Katika hukumu yake, hakimu alimtia hatiani mwanafunzi huyo kwa shtaka dogo la kuua bila kukusudia baada ya kumuondolea makosa 10 ya mauaji. “Nia mbaya haijathibitishwa, lakini kuna ushahidi kwamba mshitakiwa ndiye aliyewaua wahasiriwa, kwa hivyo kosa lililofanyika sio mauaji bali kuua bila kukusudia,” ilisema mahakama.
Ushahidi uliorekodiwa kutoka kwa mamake mmoja wa wahasiriwa ulifichua kwamba mshtakiwa alikuwa na kiberiti na siku moja aliwaonyesha wenzake jinsi ya kufanya mazingaombwe akitumia mishale ya kiberiti. Siku ya mkasa wa moto, msichana huyo alisali kabla ya kulala, akimwomba Mungu amsamehe kwa kile alichokuwa anapanga kufanya usiku huo.
Alipokuwa akijitetea, mshtakiwa alikana kuwaonyesha wenzake jinsi ya kufanya uchawi kwa kutumia mishale ya kiberiti. Pia alikana kuwa mshirika wa dhehebu la kumuabudu shetani kama inavyodaiwa na marafiki zake.
